چهارشنبه ۲۹ آبان ۱۳۹۸

چهارشنبه ۲۹ آبان ۱۳۹۸

فضائل امام حسین(ع) و گودال کربلا

۱۳۹۸ دوشنبه ۳ تیر 38 بازدید چاپ

عشق پیچیده معمّادی دل آسان ائلیور
بیر هیولاکیمی اغیاری هراسان ائلیور
عشق بیر لطف خفی دور که حق لم یزلی
نیّتی پاک اولان انسانلارا احسان ائلیور
بیر گوزل واژه دی هر یرده اونون صحبتی وار
هر محافلده اونون صحبتنون لذتی وار
طالبی چوخدی ولی منفی سی وار مثبتی وار
حقه عاشق اولانون عزتی وار جنتی وار
عشق حق زنگی لری چون مه تابان ائلیور
عشق حقه نه گوزل عرشیده سیما یارانیب
عاشیقین روحی تمیز طینتی زیبا یارانیب
قلبی نورانی اونون همتی اعلا یارانیب
روح اخلاصینه بیر قامت رعنا یارانیب
عشق بیر فضل دی اوز اهلینی عطشان ائلیور
چهره سی شاد و خرامان اوره گی پژمرده
دائم الصمت ولی ذکر خدا وار دیلده
اسم اعظم یارادیبدور جریان فکرینده
قوة قلبیله محکم دوروب اول منزلده
ملکوت اهلینی اوز عشقینه حیران ائلیور
فضلی هیهات آیرماق اولا فاضلّردن
عشقی آلماق نجه ممکن اولار عاشقلردن
وئردی عشقه بیله قیمت بیری شاعر لردن
اهل عشقه یوخی اولماز سوروش عاقلّردن
گوزلری دائم اویاخ قلبی پریشان ائلیور
عشق دیوانه ائدر عاشقی اوز سلکینده
حدّ عنوان ائدر ارباب صفا ملکینده
محکِ فعله چکر مرحله ی ائیلکینده
فانی الحقه آچار یول عرفا سبکینده
اولاری کی فعلیده گفتار یره میزان ائلیور
اوکی میزان مقدس تمام عشاقه
اوزی عزت سوزی حجتدی بنام عشاقه
مرقدی کعبه دی مرضیه مقام عشاقه
نام نامی سی حسین عشق و مرام عشاقه
زشت رو برده لری صاحب عنوان ائلیور
اسم اعظم له برابر آدینون قیمتی وار
جنت عدنون آرتیق سوزونون لذتی وار
عشقینون لوحه ی تکوینده عجب صولتی وار
مدفنی کرب و بلا مقتلینوه شهرتی وار
ترتبین توکسه لر هر قبره گلستان ائلیور
سوّمین رکن ولایتدی حسین بن علی
سلسبیلین اقاسی خلقته معنای جلی
منطقی حق مبیندور ألی الله ألی
گله بیرده بو شهون خلقته حاشا مثلی (بدلی)
سورة التین اونون شأنینی اعلان ائلیور
صاحب مجمع ائدوب بو خبری شرح و بیان
دوشه ی قارداشلارینون چنگینه اول ماه کنان
آتدّیلار قویّا او گول منظری اولدی نگران
اوز دوتوب درکه حقه ائله دی زار و فغان
دئدی سندن سورا کیم دردیمه درمان ائلیور
گوندریب جبرئیلی یوسف امداد ائله سون
ره گشا اولسون اونی بندیدن آزاد ائله سون
ابن یعقوبین اوزلین آتاسین شاد ائله سون
شرف پنج تنون حقینی ایفاد ائله سون
قتلقیّ دی بوگون یوسفی میهمان ائلیور
معدن عشق و کرم معنی خلقتدی حسین
خاس ال عبا خلقته علتدی حسین
عرفا قبله سی دور عاشقه جنتدی حسین
منتهای شرف و عزت و لذتدی حسن
جنتون اهلینی اوز فضلینه حیران ائلیور
لوحه ی عرشه او زیبا آدی زینت یارادیب
عرش و فرش اهلینه الله اونی عزت یارادیب
حیّ سبحان اوشهی مظهر قدرت یارادیب
منبع علم و ادب ، صاحب دولت یارادیب
غبطه بو دولته البته سلیمان ائلیور
مرکز تربیتی دامن پیغمبر دور
سِلم آغوشی اوسلطانه صفا پروردور
ساقه قد سینه ارواح برین چاکر دور
انبیا یاوری جبرئیل امین یاوردور
فخر خاک قدمین اوپمه گه شاهان ائلیور
مهبط وحی پیعمبر اِوی مدرسدی اونا
بند بند کتب خلقت اوزی دسدی اونا
نقش پر قدرت انسان بیوک اطلسدی اونا
رتبه ی فضل و شرفده بوقدر بسدی اونا
آدم بوالبشری طالب احسان ائلیور
کربلا مبحثی عاشقلری مجنون ائلیور
انبیاء سکمی لطفینه مدیون ائلیور
روح رحمتله عزادارینی ممنون ائلیور
بو اثر انوری ده عدنده محزون ائلیور
باغ جنتده نوا حوری و غلمان ائلیور
بوالبشر سیر ائلیین وقتده اقطار جهان
کشف اولوبدور اونا بودشتیده اسرار نهان
بغض آلیبدور بوغازین گوزلری دولدی یاشیلان
سارالیب رنگی اورک تیتردی اولدی نگران
آیاغیندان توکولن قان یری آل قان ائلیور
غم احاطه ائلدی چکدی دریندن بیر آه
اوز دوتوب درگه حقه دئدی ای ذات اله
گینه سالدی بئله بیر بنده منی هانسی گناه
یاسالیب مخمصه ی دیگره ابلیس سیاه
اولماسا مرحمتون حیله بوشیطان ائلیور
استغاثه ائلیوب گلدی اونا وحی و ندا
بو یرین آدینه آدم دیولور کرب و بلا
او حسین کی چاغیر یردون آدین هنگام بلا
بیردا اللرده اولر ظلمیله اول کان وفا
اودی قانونده سنون جوش و خروشان ائلیور
انبیانون چوخون اوردا اولوبدور گذری
جلب اولوب قتلگهِ کرب و بلایه نظری
هر پیمبر کی او مأوایه دوشوبدی سفری
روح جسمنده اونون ظاهر اولوپدی اثری
طور سیناده نوا موسی عمران ائلیور
شخص ابراهیم او پیغمبر ذوالعزّ و نسب
سیر ائدردی کره ی ارضده اول ذی منصب
چاتدی بیر وادی یَه دولدی اوره گی یاللعجب
غم آلیب قلبینی دوتدی بوغازین بغض و غضب
شدت حزن او مولانی پریشان ائلیور
مرکبون قیشلاری توقّوشدی کچوب بیربیرینه
یخدی ابراهیمی آت کرب و بلانین یرینه
باش سینوب قان توکولوب قانلو مزارین یرینه
رنکساریله دوتوب یوز دیلینون از برینه
نه سببدن یری رنگینی دئدی بوقان ائلیور
اذن صادر ائله دی واقف اسرار و نهان
آغلییان حالدا گلوب نطقه دئدی اول جوان
سنده بوچولده گرک قانوه الوان اولاسان
بو همان یردی دوشر شاه شهیدان آتدان
کربلادور سنیده قانوه غلطان ائلیور
عصر عاشورا تاپیبب مرکبی اوستونده قرار
حجت اتمام ائلیور حجّت با عزّ و وقار
داش دگوب آلنینا شدّتله اوزه قانی آخار
سوزولور قانی گوزوندن یوزه اول ماه نگار
لون ثارالله او زیبا گولی الوان ائلیور
یاشیل عمامه باشیندان آچیلوب بئلده کمر
سوکولوبدور زره اگنینده ائدوب اوخلار اثر
قیلیجی یوخدی الینده یره دوشموشدی سپر
گه باخور خیمه لره گه گویه ائیلردی نظر
زمزمه یارین آدین دیلده اوسلطان ائلیور
قالخیزیبدور کفنین دامنی نی ظل الله
ایسته دی گوزلرینی سیلسون ابا عبدالله
حرم اللهی زیارت ائله دی اوخ ناگاه
دئدی لا حول و لا قوة الا بالله
یاره لی قلبی بیده یاره او پیکان ائلیور
اوچ پر اوخ دَیدی ائدوب قلب ولایتده اثر
قلبینه اللرینی قویدی او زیبا منظر
چون مشبک بدنه ائیله دی احساس خطر
قبر شش گوشه سینه سالدی تبسمله نظر
عجله دوشمه گه گوداله او سلطان ائلیور
آتین اوستن یره دوشدی ائله کی میر خبان
گوزلرین یومدی حسین چیخدی بدن میزانان
الده نیزه باشی اوسته یتشیب ابن سنان
اصغرین زخمینی تکرار ائدیب اول نیزه ویران
ناله بو حادثه دن ختم رسولان ائلیور
او مبارک بوغازین قانی دولوب گوداله
اوز قانیلان بویادی گول بوینن چون لاله
ذات حقّه ائله یوب سجده چاتوب آماله
ملکوت اهلینی مبهوت ائله یوب اول حاله
آناسی فاطمه ده ناله و افغان ائلیور
حجة الله دی حسین خلقته سالمیش سایه
شیعه نون مفخر یدور ألده بیوک سرمایه
عالم کوینده یوخدور او شهه همپایه
سیّدا قوی یوزوی سنده در مولایه
حیّ سبحان اونا خاطر سنه غفران ائلیور

نظرات

نظر دهی برای این مطلب بسته شده است.
اولین نفر باشید که نظر می دهید!

adver2

مناسبت ها

۷ آذر ماه چهارم [30 ربيع أول]
۱۹ آبان وﻻدت ﺣﻀﺮت رﺳﻮل اﻛﺮم (ص) [12 ربيع أول]
۲۴ آبان وﻻدت ﺣﻀﺮت رﺳﻮل اﻛﺮم (ص) ـ وﻻدت اﻣﺎم ﺟﻌﻔﺮ ﺻﺎدق (ع) [17 ربيع أول]
۱۵ آبان ﺷﻬﺎدت اﻣﺎم ﺣﺴﻦ ﻋﺴﻜﺮي (ع) [8 ربيع أول]

اوقات شرعی

اذان صبح 06:17
طلوع خورشید 07:45
اذان ظهر 12:50
غروب آفتاب 17:55
اذان مغرب 18:14
نیمه شب شرعی 23:02

پایگاه اطلاع رسانی اجاق نژاد
حجت الاسلام والمسلمین حاج سید علی اکبر اجاق نژاد (مدظله العالی)
تمام حقوق سایت متعلق به ocaqnejad.net می باشد.
استفاده از مطالب با ذکر منبع بلامانع است
طراحی و توسعه توسط: