عرش غیرتّده قاناد وئر گور اثر فردوسیدن
باش اوجالماق اعتبارین آل خبر فردوسیدن
من دئسم آدون گلنده داغلاری وحشت بورور
دوزدی ، همّت درسینی آلسون اگر فردوسیدن
پرده پرده عصرلر کئچمیش ولی یرسیز دگول
گر شجاعت ائیندیده منّت چکر فردوسیدن
تپراق اولموش چوخ سارایلار ، قصرلر ، منظومه لر
چوخ گوروب ظالم حکومتلر ضرر فردوسیدن
ربّنا عزمیله ییخ افراسیاب نفسوی
رستم اول نا حقی سیندیر ، آل ثمر فردوسیدن
مدح اولارهاردا ، پیمبر وصف اولارهاردا علی
حرمت و منّتله سید یاد ائدر فردوسیدن
